夢よ羽ばたけ 夢よ翔んでけ

   「天馬茶房」這齣電影足好看，毋過我感覺真悲傷。佇日本政權之下，台灣人演戲愛有兩套，日本人閣時行巡視，結果戲攏演無煞。掠準台灣光復了後，這款情形會好轉，結果大陸軍官無佮意人講台語，禁止劇團閣再演戲。佇彼時陣，阿進khì-hōo銃子彈tio̍h就死去，彼條幸福進行曲變足可笑。我感覺咱台灣人ê立場真苦憐，徛佇佗一爿攏毋是人。

    日本戰敗，台灣光復，台灣人本底真期待看tio̍h祖國ê軍隊威風ê模樣，結果予人足失望，完全無成戰贏ê感覺。毋過智識份子真歡喜，因為怹認為會當投入政治，但是高層官員二十人內面干單有一个台灣人。「台灣省行政長官公署」ê設立根本是殖民體制ê延續。政府和官員啥物攏欲愛，「接收變做劫收！」尚譀ê是咱台灣人家己種家己做ê糖，佇台灣賣愛一百七十摳，賣去上海干單一百四十就買會著，損失六十億，米糖之鄉煞咧欠米佮糖。治安嘛變足bái，光復了後，刑事案件增加二十八倍，官兵變做強盜，規个社會piàn-kah足亂。

    一九四七年，二二八事件爆發。以前我叫是這毋是偌嚴重ê代誌，結果死足濟人，實在有夠恐怖。官兵刣人攏無目一个nih，真正足冷血，陳儀處理代誌實在真飯桶，予人足受氣。蔣中正伊無共代誌查清楚就派兵，無彩伊是一位指揮官。這个事件使人毋敢閣插政治，實在是非常悲哀。

    「歷史是hōo-lâng記取教訓，毋是欲引發衝突。」雖然歷史有一部分使人足憤慨，想欲追究責任，毋過人死無法度閣活起來，咱應該愛反省，勿閣犯著仝款ê錯誤，毋是造成種族之間有冤仇。