夢よ羽ばたけ 夢よ翔んでけ

    英文話劇總算佇拜一的英文課圓滿結束矣！我發現有一寡平常時較閉思的人，佇台頂演戲攏真敢演，實在予我足意外。因為是英語，所以我無法度深入共我的台詞內面所欲表達的感覺表現出來，真可惜，無彩我感覺家己嘛真guâ演戲。戲搬煞，我的腳嘛烏青矣，真苦憐。假跋倒結果變真的，兩爿腳頭窩攏烏青，毋知影當時會好。

    拜一下晡愛寫一篇作文，高中時陣的惡夢閣來矣！無定定訓練，若欲寫出優美的詞實在有困難，而且成語攏袂記了了，雖然學姐講無要緊，毋過按呢文章讀起來就無媠矣。好佳哉題目無足困難，猶無五百字毋知影欲去佗位生。

    拜三開始歇睏，本底欲去看醫生，毋過我傷貧惰出門，人講「計劃永遠趕袂著變化」實在真有道理。下晡我坐車轉去舊厝，因為拜四就是清明矣，我愛轉去鬥相共。自從高中來台中讀冊了後，轉去的機會真少，看著厝邊的囡仔已經大漢矣，足歡喜。怹看著我就走來共我攬牢牢，雖然我無表現出來，毋過我的心內足感動。踏入厝內，回想著以前佮阿爸做伙的日子，目屎雄欲流出來。這馬干焦阿爸一个人帶佇舊厝，若換做是我，我一定會感覺真孤單，按呢想起來，我真正真不孝。毋過阿爸伊講我若是有好好讀冊，勿予伊煩惱，按呢就有夠矣！我足想欲較緊共冊讀了，然後趁錢照顧爸母。阿爸佮阿母攏已經五六十歲矣，年歲真大，身體嘛無講蓋好，怹若是繼續做空課，我真煩惱會袂堪得。這擺轉去，我佮阿爸講真濟話，阿爸講我有真濟優點，毋過缺點嘛有，伊所講的每一項攏著扦。雖然阿爸有時真囉嗦，毋過伊真正足了解我。

    時間過了真緊，一个禮拜又閣欲過去矣，愛把握時間讀冊、趁錢、有孝爸母。我想我若有時間愛較定轉去舊厝陪阿爸，按呢伊才袂傷無聊。