夢よ羽ばたけ 夢よ翔んでけ

    我感覺這禮拜實在有夠無閒，足濟代誌愛做。愛排練英文話劇，後禮拜一就愛驗收矣！我講英語真正袂輾轉，攏感覺會咬著喙舌ê款。毋過學任何語言攏仝款，愛較誠練習，我應該是因為驚人笑，所以攏毋敢講英語。唉！英語若是佮日語仝款好耍就好矣。

      拜三早起，阮班合唱練煞欲去上台灣史雄雄地動，我拄好咧行樓梯，彼時陣叫是我頭咧楞，尾仔愈搖愈厲害，才知影是地動，有小可仔驚著。好佳哉無搖真久，台灣各地的災情才袂足嚴重。

    拜四我愛上台報告，實在足緊張，我準備誠久矣，當然希望有好的結果，今仔日報告煞，心內的石頭暫時會當囥落來，希望成績袂傷歹看。尚緊張是暗時ê合唱比賽，我是第二部，定定予第一部搝去，若無就是唱走音，實在足見笑。毋過咱台語系真正足guâ，得著第三名！我尚感動ê所在是逐家唱「十八姑娘」進前，舒嬅佮建翰演ê父女戲。離開厝去外地讀冊，離開爸母ê身軀邊真久，有當時仔攏袂想著愛敲電話轉去厝內共怹報平安，開一下子講。彼句「爸！媽！我愛你！」使我咧唱歌ê時，差一點哭出來。「十八姑娘」是一條充滿感情的歌曲。恭喜得獎！