夢よ羽ばたけ 夢よ翔んでけ

1973年爆發第四擺的「以阿戰爭」，阿拉伯石油輸出國家組織為著欲打擊以色列佮伊的支持者，所以實施石油減產佮禁運，造成了第二擺的石油危機。石油危機造成全球經濟嚴重衰退，台灣面對石油危機的打擊，蔣經國決定推動「十大建設」，以大量公共投資振興建設，而且解決台灣基礎建設不足的問題。

「十大建設」：一、中山高速公路；二、鐵路電氣化；三、北迴鐵路；四、中正國際機場；五、台中港；六、蘇澳港；七、中國鋼鐵公司；八、中國造船廠；九、石油化學工業；十、核能一廠

雖然十大建設予台灣的經濟漸漸好起來，毋過七○年代的台灣抵好面臨了對農業到工商社會的激烈轉型，非常濟的外資投入台灣，工商主導的經濟之下，農村社會受著真大的打擊，活佇傳統農村社會的小人物煞變成七○年代的悲劇主角。黃春明、洪醒夫、王禎和身為文學創作者看著這款狀況非常煩惱，in以無仝的方式來記錄in所經歷的社會。黃春明先生的作品《兒子的大玩偶》有拍做電影，佇阿爸的笑容當中，我看著的卻是真深的無奈。

1977年中壢地區民眾抗議縣長選舉無公平引發了「中壢事件」，了後「余登發命案」引發「橋頭示威」。這連紲的事件攏反映國民黨處理代誌無妥當，已經引發台灣民眾的不滿矣！1979年12月10日是國際人權日，美麗島雜誌社辦晚會煞佮警察起衝突，爆發「美麗島事件」。這个事件為八○年代拍開了激動的序幕。真濟佇美麗島事件予人掠去的人的親人徛出來參加選舉，結果攏高票當選，美麗島事件的影響真正足大。

1980年發生一件悲劇「林家血案」，林義雄的查某囝佮阿母攏予人刣死。為啥物有的人的心肝遮爾雄，竟然下這款毒手。我感覺執政的人愛去了解歷史以及反省為啥物會造成這款悲劇。

1989年「鄭南榕自焚」，鄭南榕先生提倡台灣獨立，伊捌講過：

「我們這些住在台灣的人，雖然與西藏距離千萬里，其實命運卻是差不多的。數百年來，一直處在外來殖民政權的奴役統治下，受到比一般文明人類更為低等的待遇。多年來台灣人民所追求的，是建立一個完整的主權，以及在國際社會上擁有一個獨立的國格。和西藏以及全世界所有被奴役與被殖民的地區一樣，我們必須反抗奴役人民的政權，爭取獨立的國格，才能恢復我們每個人完整的人格。」

伊的想法一開始並無受著重視，一直到了鄭南榕先生自焚往生，才開始有人覺醒，台灣獨立的喝聲愈來愈大。鄭南榕先生的死換來台灣的新生。

「愛拚才會贏！」台灣有這馬的幸福攏是以前的人拍拚得來的，為著咱的未來，為著咱的囝孫，咱愛繼續拍拚才會出頭天！