夢よ羽ばたけ 夢よ翔んでけ

    期中考彼禮拜，我心內的壓力真大，足驚會考無好。我四月二十號彼工足忝，因為我上班十二點鐘，轉到厝已經無氣力去讀冊矣，但是閣兩工就欲考英語，我一个字攏猶未看，心內足著急，毋知影欲按怎才好。隔轉工暗時我足緊看了一遍，毋過猶是無夠熟，尾仔我放棄矣，考bái就煞煞去。好佳哉老師真仁慈，無考傷困難，抑若無我就死甲真歹看。

    英語考煞規身軀變甲足輕鬆，上煩惱的一科總算結束，下晡閣毋免上國文課，愈想愈歡喜，結果煞袂記得體育課的考試嘛真歹過。我第一擺考足bái，我傷緊張，傷過在意姿勢是毋是有正確，我的手一直掣，拍的球攏烏白飛。好佳哉第二擺有及格，雖然分數毋是真媠，毋過我已經滿足矣！

    拜三到拜五的考試我較有把握，因為進前已經有準備，所以毋免傷煩惱，毋過我傷過自信，犯著有一寡無應該犯的錯誤，真正愛反省。考試攏考了矣，為著欲予家己一个安慰，嘛辛苦家己有盡力，我佮阮小妹約去全球看電影。阮看「航海王」，雖然彼是動畫，毋過內面有足深的意義，當然愛去思考才會了解。我印象上深刻的是魯夫伊袂放棄伊的同伴家己向前，伊會佮in做伙行，互相扶持。而且伊毋管別人按怎想，伊堅持家己的理想佮目標，就算別人一直打擊伊，伊猶原袂放棄。魯夫的精神是咱會當學習的！